Arrestohet në Shkodër Bledar Cafi i akuzuar nga SPAK për grup kriminal / Rishpallet në kërkim Endrit Dokle

Bledar Cafi, 50 vjeç, është arrestuar në orët e para të mëngjesit në banesën e tij në Shkodër, i cilësuar nga policia si person me rrezikshmëri të lartë shoqërore.

Ndërsa Endrit Dokle, alias Indrit Dokle, 43 vjeç, nuk është gjetur gjatë kontrolleve të zhvilluara në kuadër të një operacioni të drejtuar nga SPAK.

Operacioni, i koduar “Muri i Lartë”, u zhvillua nga Policia e Shtetit në bashkëpunim me BKH-në, nën drejtimin e Prokurorisë së Posaçme.

Në fokus të tij ishte ekzekutimi i masave të sigurisë të vendosura nga GJKKO dhe lokalizimi i personave të shpallur në kërkim.

Për Bledar Cafin, GJKKO ka caktuar më 25 shtator 2026 masën e sigurisë “Arrest me burg”.

Sipas vendimit, ai akuzohet për “Trafikim të lëndëve narkotike”, kryer në bashkëpunim, në formën e grupit të strukturuar kriminal, si dhe për veprat penale “Grup i strukturuar kriminal” dhe “Kryerja e veprave penale nga organizata kriminale dhe grupi i strukturuar kriminal”.

Ndërkohë, në kuadër të të njëjtit operacion, policia ka kryer kontrolle për gjetjen e Endrit Dokles, alias Indrit Dokle, i cili është rishpallur në kërkim.

Sipas policisë, kontrollet janë ushtruar në një vilë në Daias të Tiranës dhe në një banesë në Astir, por Dokle nuk është gjetur.

Dokle, 43 vjeç, lindur në Kukës dhe banues në Tiranë, rezulton person në kërkim që prej vitit 2024.

Edhe për të, GJKKO ka caktuar masën e sigurisë “Arrest me burg” për akuzat për trafikim të lëndëve narkotike, në bashkëpunim dhe në formën e grupit të strukturuar kriminal, si dhe për krijimin e grupit të strukturuar kriminal dhe kryerjen e veprave penale nga organizata kriminale dhe grupi i strukturuar kriminal.

Operacioni “Muri i Lartë” u zhvillua nga struktura të Policisë së Shtetit, përfshirë Forcat Speciale RENEA, strukturat operacionale dhe ato që hetojnë narkotikët, në bashkëpunim me BKH-në.

Pas kontrolleve të kryera pa rezultat për gjetjen e Dokles, policia deklaron se vijon puna për lokalizimin dhe kapjen e tij.
Sqaroj kundërshtinë mes arrestimit dhe kërkimit.