Tragjedia e elektricistit / Banorët; Faji i shtetit, linja 40 vite e amortizuar

Në një shtyllë elektrike, në fshatin Bardhaj në Shkodër, mori fund tragjikisht jeta e 34-vjeçarit Angjelin Nika. Elektricisti që doli për të kryer punën e tij, por që nuk u kthye më pranë familjes.

Mbrëmjen e së hënës, ai ishte thirrur nga disa familje që kishin mbetur pa energji elektrike. Sipas policisë, gjatë ndërhyrjes për riparimin e një defekti, elektricisti dyshohet se ka rënë në kontakt me rrymën elektrike. Ai u dërgua në spital por fatkeqësisht pa shenja jete.

Sot, në Bardhaj, pranë vendit ku ndodhi tragjedia, banorët flasin me dhimbje për humbjen e tij. Por mes keqardhjes dhe ngushëllimeve, ata ngrenë një shqetësim që, sipas tyre, prej vitesh është lënë pas dore, rrjeti elektrik i amortizuar.

Linjat janë mbi 40-vjeçare, thonë banorët, të cilët kërkojnë investime dhe zëvendësimin e tyre, për të shmangur rreziqet dhe për të mos lejuar që infrastruktura e vjetër të kthehet në kërcënim për jetën.

Shkodra Live ishte në vendin e ngjarjes, aty ku shtylla elektrike mbetet dëshmi e një tragjedie që ka tronditur komunitetin por edhe më gjerë.

Angjelin Nika ishte vetëm 34 vjeç, duke lënë pas bashkëshorten e cila pritet të bëhet nënë për pak kohë si dhe një dhimbje të madhe për të gjithë familjen.

Shkodra Live i shpreh ngushëllimet e sinqerta familjes Nika.

Ky rast dhe shumë të tjerë duhet të shërbejnë si këmbanë alarmi për institucionet shtetërore në mënyrë që ngjarje kaq të rënda të mos përsëriten më.