15 vite ura e shembur në Theth / Banori: 4 lagje të bllokuara, bëjmë dy orë në këmbë…

Një banor nga Thethi në Dukagjin ka denoncuar një urë të shembur prej të paktën 15 vitesh.

Banori thotë se urën e ka marrë lumi përpara prej të paktën 15 vitesh dhe sipas tij prej asaj kohe ende nuk është rikonstruktuar.

Ura e cila ndan në mes lagjen Nikgjonaj, lidhet edhe me 4 lagje të tjera, Gjelaj, Okol dhe Gjeçaj.

Mungesa e urës sipas banorit i detyron ata që të bëjnë deri në dy orë në këmbë në një kohë që kjo ecje kaq e gjatë mund të ishte shmangur në rast se do të ishte ura.

Banori thotë se e kanë denoncuar rastin në të gjitha institucionet por prej 15 vitesh askush nuk ka marrë asnjë masë.

Ajo që kërkojnë banorët është rikonstruksioni në një kohë sa më të shpejtë i urës së shembur për të lehtësuar lëvizjet në lagjet e përmendura më lart.

Po ashtu ura e shembur gjithë këto vite është një imazh aspak i mirë në sytë e mijlra turistëve të cilët vizitojnë Thethin gjatë gjithë vitit.