Kryebashkiaku Beci: Shkodra yll në ngjitje sipas revistës Monitor

Revista Monitor ka publikuar së fundmi një analizë mbi të dhënat e Airbnb për apartamentet me qira afatshkurtër në qytete të ndryshme të vendit, ku Shkodra renditet mes zonave me rritje të ndjeshme gjatë vitit të fundit. Sipas të dhënave, evidentohet shtim i numrit të turistëve, rritje e të ardhurave dhe dyfishim i njësive të disponueshme brenda një viti.

Statusi i plotë i kryetarit të bashkisë Shkodër Benet Beci:

Shkodra, ‘yll i ri në ngjitje’ – kështu e ka titulluar Revista Monitor seksionin për Shkodrën në analizën e të dhënave të Airbnb mbi apartamentet me qira afatshkurtër.

Një numër turistësh në rritje, të ardhura të kënaqshme dhe një dyfishim të njësive të disponueshme brenda vetëm një viti.

Paralelisht, rritja e numrit të bizneseve aktive e bën panoramën edhe më inkurajuese për ekonominë lokale në Shkodër.

Këto të dhëna mund të mos i përshtaten narrativës së ndonjë deputeti të opozitës që flet për ‘mbyllje masive’ biznesesh në Shkodër, por ky nuk është problemi ynë. Faktet janë kokëforta.

Shkodra sapo e ka nisur rrugëtimin e saj drejt suksesit dhe ka të gjitha arsyet për të besuar se do të shkojë atje ku i takon.